Saturday, February 6, 2010

بسم الله


كتير بنلاقي كتب وتعجبنا ونشتريها 

ولما نروح البيت نركنها ونطنش نقراها 

ويلف الوقت ونلاقي كتب من تاني ونشتريها 

ونرجع نحط الكتب الجديدة جمب أخواتها 

وهكذا دواليك

لا منك قريت واستفدت بالكتب اللى عندك

ولا منك سبتها حد غيرك يشتريها ويستفيد منها  

*****
إقـرأنـــي .. شـكــراً 

دي دعوة بيوجهالك كل كتاب فى مكتبتك مكسل تقراه

وسايبه مركون بقاله سنين لحد ما خلل وكمكم من الركنة

الكتاب ده لو بينطق ماكنش حيقولك أكتر من كدة 

 إقرأني من فضلك

لأن دي وظيفته الأساسية وهو قاعد فى بيتك للهدف ده 

لا هو ديكور ولا كمالة عدد ولا عشان لايق على لون المكتبة

المدونة دي دعوة للقراءة 

خصوصا لقراءة الكتب المركونة عندنا ومكسلين نقراها 

والدعوة دي موجهة من كل الكتب لكل الناس 

بما فيهم اختكم اللى فاتحة المدونة دي

لإن دي ظاهرة عامة صايبة الكل بعيد عنكم

*****

انتوا عارفين الزن وحش

عشان كدة مش ححاول أزن عليكوا فى حكاية القراءة دى

خالص انا كل اللى ححاول اعمله إن شاء الله 

انى اكلمكم عن علاقتي بالكتب 

وحكاياتي معاها

بحس بإيه وليه بحب أقرأ وإزاي بقرأ وبستفيد ايه

إن شاء الله نستمتع بوقتنا سوا فى المدونة الجديدة 

وفى صحبة أحبابي وأصدقائي 

الكـــتب  

 ***** 


بينا على حفلة افتتاح المدونة الجديدة بقا

 الجاتوه كتير والساقع أكتر

والدي جي مولع الدنيا 

* الست لما .. لما لما *

يلا نزل الساقع يابني الإفتتاح النهاردة

حاسب توقع الكهارب ياعم دي متكلفة

اتفضلي يا هانم أهلا أهلا

أهلا يا بيه نورتنا

* ده انا اللى يبعني ابيعه انساه لو هو ... اييييييييه *

باكو لبنان؟!!ا

لأ معنديش دي دكانة كتب ياعم الحاج مش كشك سجاير

ماتحفيش يابت انتى الجاتو بالعدد

الساقع ساقع أوي فى البرد ده مش كدة؟

بلاش أحسن هاتوه أرجعه للراجل

* البرتقااان البرتقان ولا عنب بقا ولا رمااان *

أينعم انا ممنوعة من الإكثار من الحلويات 

بس أوعوا تفكروا انى بصالكوا فى الجاتوه ولا حاجة 

أبداً .. مستحيل .. أبسوليوتلي

كحححححححححححححححح
كحححححححححححححححح
كحححححححححححححححح

يالهوي الولية سورقت 

إحم إحم .. كفاية حفلة لحد كدة أحسن تسورقوا كلكوا

* آه ياني ياني يااااني .. مش حعمل كدة تاااااني *

15 comments:

إنـســـانـة said...

بسم الله

و القادم....أجمل said...

تيراريراا تيرااريراا
هيييييييييييييه
بسم الله الرحمن الرحيم و هنبدأ الليلة
تيرررارارارا
تيرارارارارا
مبرووووووووووووك
مدووونة جاااااامدة
فكرتها بجد وهمية
و دعوة جميلة جدا للقراءة
الاستايل تحفةةةةةةةةةةة تحفة
ربنا يكرمك يا يااااسو
و كان يعني لازم تحطي انتي اول كومنت
عشان ترضى تفتحلنا
:D
حقك يا جميل
و سمعنا

في الكتب قرينا
في الكتب رأينا
الكلمة جنب الكلمة
فلة جنب
يااااااااااااسميييييييييينة
هيييييييييييييييييييه
لولولولوي ي ي ي ي
:D

بسمة said...

طيب

علشان خاطرك انتي بس همسك اخر رواية جبتها وافليها :)

Anonymous said...

وجاااااااف منك لها له لهااا له .مزيكا وطبل وزمر يا وجعه سودا وكتب كمااااااااااان مفيش حكومه في البلد ولا ايه وايه ده حلويات اهو دي اول حاجه متصادره ولا اجوللك اجتع
لي ورجتين من اي كتاب اصادر الحلويات دي فيهم جال كتب جال بلا جلت حيه..........اللهم اكفينا شر الغباء والاغبيااااء ويجعل كلامنا خفيف عليهم........الف مبروك متعك الله بانسانيتك وظهورك وادام عليكي وعلي اصدقائك وجوودك الجميل

Bothayna said...

مبرووووك
فكرة جميلة وجاية في موسم الحماس بوجود معرض الكتاب
بالتوفيق يا جميلة

islamz said...

معرض الكتاب السنة دى انا اشتريت عربية كتب عاوز اقاراهم كلهم مع بعض .. انا عارف نفسي بفضل شويه كده ابص للكتب زى الاكل كده واشوف انهى عاجبنى اكتر وابتدى فيه ..

مبروك الافتتاح :]

MedZag said...

الف مبروك المدونة
يعني تقوليلي علي برنامج عصير الكتب
وتفتحي محل الكتب في يومين ورا بعض

دا احنا محظوظين علي كده
وفي انتظار كتاب شيق

عاشقة الأقصى)walaa rizk( said...

انا مش بس معاكى
أنا هاقعد فى المدونه دى على طوووووووووول
وحشتينى ياسمسمه

mohamed said...

:)
مبروك يا ياسمين المدونة الجديدة :)

تدوبيها في كتب العافية

الباحث عن الصفر said...

روحى يابتنى ربنا يجبر بخاطرك وما يركنك على رف ابدا قادر ياكريم
امضاء كتاب مركون

مبروك ع المدونة وان شاء الله يمتعنا اللى جاى

ألـوان التفاؤل ~ said...

بالبركة =)
حلوة .. واحلى شي انها عن القراءة

منتظرين مواضيعك القادمة بشغف : )

واتمنى لو تغلب اللغة العربية على اللهجة العامية في تدويناتك لأن للمدونة زوار من خارج مصر ايضا ;D


يعطيج العافية وتسلم يدج

المجاهدة said...

عاجباني اوى فكرة المدونة دي
و فعلأً عندي كتب كتيرة اوى اوى لسه محطوطة في الكيس بتاع المكتبة بتاعتها حتى :s
ممكن بقالها سنة عندي مركونة...

الحمد لله انك هتزني عليا عشان ارجع تاني اقراهم :d

وحشاني اوى على فكرة :):)

أحلى حياة said...

لولولولولولولولولولولولولولولولولولولولولولولولولولولولولوييييييييييييييييي
لولولولولولولولولولولولولولولولولولولولولولوييييييييييييييييي
لولولولولولولولولولولولولولولولولولوييييييييييييييييييييي
ياألف نهار أبيض ياألف نهار مبروووووك
لولولولولولولولولولولولولولولولوييييييييييييييي
الصلاة ع النبي الصلاة ع النبي
حصوة في عين اللي ما يصلي ع النبي
لولولولولولولولولولولولولولولولولولولولولولولولولولويييييييييييييييييييييييييي
عقبال عندك ياام فاروووووق
لولولولولولولولولولولويييييييييييي

فين الجاتوه بتاعي يابت؟؟

آخر أيام الخريف said...

انتى بجد مدهشة...و مدهشة دى الكلمة اللى انا لقيتها بس انتى تستاهلى اكتر منها كمان...

كفاية قوى تتر فريسكا اللى انتى حطاه..انا كنت فاكرة انا الوحيدة فى مصر اللى سمعت عن المسلسل ده..هاهاها

انا فخورة بمعرفتك

يا مراكبي said...

ألف مبروك المدونة الجديدة وبرافو على الدعوة الجميلة دي

المهم .. ده كان أول بوست .. التاني بقى عن ايه؟